काठमाडौं । प्रमुख प्रतिपक्षी दल नेकपा एमालेले इजरायलमा रहेका नेपालीहरूलाई उद्धार गर्न सरकारको ध्यानाकर्षण गराएको छ ।

प्रतिनिधिसभाको आइतबारको बैठकमा विशेष समय लिएर बोल्दै एमालेका प्रमुख सचेतक पदम गिरीले इजरायलमा रहेका नेपालीको उद्धार गर्ने काममा एक मिनेट पनि ढिलाइ नगर्न सरकारसँग आग्रह गरेका हुन् ।

गिरीले हमासको आक्रमणमा परेर बन्दी जीवन बिताइरहेका नेपालीहरूको तत्काल उद्धारका लागि प्रधानमन्त्री पुष्पकमल दाहाल प्रचण्डले त्यहाँका समकक्षी बेन्जामिन नेतान्याहूसँग तत्काल संवाद गर्नुपर्ने बताएका हुन् ।

प्रमुख सचेतक गिरीले सरकारले आक्रमणमा परेर घाइते भएकाहरूलाई तुरुन्तै उपचारको आवश्यक व्यवस्था मिलाउनुपर्ने पनि बताए ।