काठमाडौं । प्रधानमन्त्री पुष्पकमल दाहाल ‘प्रचण्ड’ले आज दिउँसो २ बजेका लागि सर्वदलीय बैठक आह्वान गरेका छन् ।

प्रधानमन्त्रीको सचिवालयले जनाए अनुसार सिंहदरबारमा बस्ने बैठक भूकम्प प्रभावित क्षेत्रमा जारी उद्धार, राहत र पुनर्स्थापनाको विषयमा केन्द्रित हुनेछ ।

यही कात्तिक १७ गते शुक्रबार राति जाजरकोटको बारेकोट गाउँपालिका–१ रामीडाँडा केन्द्रविन्दु भएर ६.४ म्याग्निच्युडको भूकम्प गएको थियो । भूकम्पमा परी जाजरकोट र रुकुम पश्चिममा गरी १५३ जनाको मृत्यु भइसकेको छ, जसमध्ये ८३ बालबालिका छन् भने साढे ३ सय जना घाइते भएका छन् ।

भूकम्प प्रभावित क्षेत्रमा सरकारको घोषित नीतिअनुसार राहत वितरणमा एकद्वार प्रणाली अवलम्बन गरिएको छ ।

सरकारले भूकम्पमा परी मृत्यु भएकाका परिवारलाई प्रतिपरिवार दुई लाख रुपैयाँ राहत र घाइतेहरुको निःशुल्क उपचार गर्ने निर्णय गरिसकेको छ ।