काठमाडाैं । चालु आर्थिक वर्ष ०८०/०८१ को पहिलो त्रैमास (साउन-असोज) सम्मको वित्तिय विवरणअनुसार शिवम् सिमेन्टको कुल आम्दानी घटेको छ । शिवम् सिमेन्टले असोजसम्ममा १ अर्ब ६४ करोड ८८ लाख ३६ हजार कुल आम्दानी गरेको छ । जुन गत वर्षको सोही अवधिको तुलनामा भन्दा कम हो । गत वर्षको सोही अवधिमा शिवमले १ अर्ब ८४ करोड ७९ लाख ४५ हजार रूपैयाँ आम्दानी गरेको थियो ।

कुल आम्दानी घटेसँगै पहिलो त्रैमासमा कम्पनीले नोक्सानी व्योहोरिएको छ  । कम्पनीका अनुसार आम्दानीभन्दा खर्च बढी हुँदा कम्पनीले नोक्सानी व्योहोर्नुपरेको हो । असोजसम्ममा कम्पनीले ५ करोड ३४ लाख रुपैयाँ नोक्सानी व्यहोरेको छ। गएको आर्थिक वर्षको यही अवधिमा भने कम्पनीले २७ करोड ४७ लाख रुपैयाँ खुद नाफा कमाएको थियो।

असोजसम्ममा कम्पनीको कुल खर्च १ अर्ब ७० करोड २५ लाख रुपैयाँ पुगेको छ, गत आर्थिक वर्षको सोही अवधिमा कम्पनीको खर्च १ अर्ब ५७ करोड ७४ लाख थियो ।

वित्तिय विवरणअनुसार कम्पनीको प्रतिशेयर आम्दानी ऋणात्मक देखिएको छ । पहिलो त्रैमासमा कम्पनीको प्रतिशेयर आम्दानी ४.८६ प्रतिशतले ऋणात्मक छ । त्यस्तै प्रतिशेयर नेटवर्थ २०५ रुपैयाँ ५ पैसा छ।