काठमाडौं । नेपाली सेनाका एक कर्मचारीलाई आफ्नै साढु दाईले युवती प्रयोग गरी बलात्कार मुद्दामा फसाउने प्रयास गरेका छन् । त्यस्तो घटनामा प्रहरीले युवतीलाई पक्राउ गरेको छ ।

नेपाली सेनाका कर्मचारी राजनबहादुर बस्नेतलाई उनका साढु दाई रामेछाप उमाकुण्ड घर भई काठमाडौं बस्ने जयन्त थापाले फसाउने प्रयास गरेका हुन् । एक युवतीलाई बस्नेतविरुद्ध बलात्कारको उजुरी हाल्न लगाई उनले फसाउने गरेका हुन् ।

त्यसरी प्रयोग भएकी युवती कञ्चनपुर बेलडाँगीकी अनिता रोकायलाई प्रहरीले पक्राउ गरी आपराधिक विश्वासघातको मुद्दा चलाएको छ । जयन्तलाई फरार अभियुक्तका रुपमा प्रतिवादी बनाइएको हो । बस्नेतसँग पैसा भएकाले सोही रकम हात पार्न उनीहरुले बलात्कारको उजुरी दिएर ब्लाकमेलिङ गरेका हुन् । यसका लागि थापाले नै युवतीलाई पैसा दिएका थिए ।

कोटेश्वरको मितेरी गेष्ट हाउसमा बलात्कार भएको भन्दै प्रहरीमा युवतीले उजुरी दिएकी थिइन् । पछि बस्नेत त्यहाँ पुगेको पुष्टि नभएपछि घटना नक्कली भएको र ब्लाकमेलिङ गरिएको पुष्टि भएको हो ।