एजेन्सी । न्युजिल्याण्डकी एक सांसदमाथि चोरीको आरोप लागेपछि राजीनामा दिएकी छिन् ।

ग्रीन पार्टीका गोलरिज घहरामनमाथि अकल्याण्ड र वेलिंग्टनमा रहेका दुई कपडा पसलबाट तीन पटक चोरी गरेको आरोप छ । यसबारे प्रहरीले अनुसन्धान गरिरहेको छ।

उनले अकल्यान्ड बुटीकबाट डिजाइनर ह्यान्डब्याग लिएको सीसीटिभी फुटेजमा देखिएको बीबीसीले जनाएको छ । सो घटना बाहिरिएपछि उनले मंगलबार सांसद पदबाट राजीनमा दिएकी हुन् ।

उनले विज्ञप्ति जारी गर्दै जनताले आफ्ना जनप्रतिनिधिहरुबाट गर्ने अपेक्षा विपरीत व्यवहार भएको भन्दै माफी मागेकी छन् । उनले भनेकी छन्, ‘मैले धेरै जनालाई लाजमर्दो बनाएको छु र त्यसको लागि माफी चाहन्छु ।’

संयुक्त राष्ट्र संघमा मानव अधिकारको वकिल रहिसकेकी गोलरिज सन् २०१७ मा पहिलो शरणार्थी सांसद बनेर इतिहास रचेकी थिइन् ।