काठमाडौं । एमएससी एरिज जहाजसँगै इरानको नियन्त्रणमा पुगेका पाँच भारतीय नागरिक रिहा भएका छन् ।

इरानस्थित भारतीय दूतावासले सोसल मिडिया प्लेटफर्म एक्समार्फत इरानको नियन्त्रणमा रहेका आफ्ना पाँच नागरिक मुक्त भएको जनाएको छ ।

रिहा भएका भारतीयलाई शुक्रबार साँझ भारत पठाउने तयारी छ ।

इरानको नौ सेनाले गत अप्रिल १३ मा भारत आउँदै गरेको कार्गो जहाज नियन्त्रणमा लिएको थियो । उक्त जहाजमा २५ सवार रहेकोमा १७ भारतीय नागरिक थिए । जहाजका मालिक इजरायली हुन् ।

इजरायलसँग जारी तनावबीच इरानले यो कदम चालेको हो ।

जहाजको चालक दलमा एक मात्र महिला क्याडेट एन टेसा जोसेफ पनि थिइन् । उनलाई भने जहाज नियन्त्रणमा लिइएको केही दिनपछि नै छाडिएको थियो ।