काठमाडौं । नेपाली कांग्रेसका सांसद धनराज गुरुङले गाँजा खेतीका लागि कानुन बनाउन आफूले पटक–पटक निर्देशन दिँदा पनि पालना नभएको बताएका छन् ।

आफू कानुन मन्त्री भएको बेलामा गाँजालाई औषधीजन्य प्रयोगका लागि आवश्यक कानुन तर्जुमा गरेर ल्याउन सचिवलाई भन्दा पनि कहिल्यै नआएको बताएका हुन् । आज संसदमा राजस्वको आय र व्ययबारे छलफलमा सहभागी हुँदै उनले यस्तो बताएका हुन् ।

सोही समयमा उद्योग मन्त्रालयक सचिवहरुलाई आफैंले पटपटक भेटेर भेटेर घरेलु मदिरा व्यवस्थापनका लागि छिटो कानुन तर्जुमा गरिदिनु भन्दा पनि पालना नभएको बताएका छन् । यी क्षेत्रहरूमा योजनाहरु बनाएमा ८ खर्ब राजस्व उठ्न सक्ने र आन्तरिक र वाह्य ऋणको भर पर्नुपर्ने अवस्था नआउने उनको दाबी छ ।

गाँजा खेतीको सन्दर्भमा सरकारले चालु आर्थिक वर्षको बजेट भाषणमा पनि कानुन तर्जुमा गर्ने भनेको थियो । तर अहिलेसम्म कानुन तर्जुमा हुन सकेको छैन । सरकारले आगामी आर्थिक वर्ष २०८१/८२ को बजेटमार्फत पनि गाँजा खेतीलाई वैधाकिता दिनका लागि कानुनी व्यवस्था गरिने विषय दोहोर्याएको छ ।