काठमाडौं । नेपाली कांग्रेसका उपसभापति तथा पूर्वकानून मन्त्री धनराज गुरुङमाथि पनि सहकारी ठगीमा अनुसन्धान सुरु भएको छ । प्रहरीको केन्द्रीय अनुसन्धान ब्यूरो(सिआइबी)ले उनीमाथि अनुसन्धान अघि बढाएको हो ।

ललितपुरस्थित मितेरी बचत तथा ऋण सहकारी संस्था ठगीको अभियोग उनीमाथि छ । उनकी पत्नी ज्योती गुरुङ सो सहकारीकी उपाध्यक्ष थिइन् । उनी उपाध्यक्ष हुँदा सहकारीको १५ करोड हिनामिना भएको हो । ज्योती हाल विदेशी गइसकेकी छिन् । हाल सो सहकारीका अध्यक्ष कुम्भराज गुरुङले नै धनराज र ज्योतीविरुद्ध सिआइबीमा उजुरी दिएका छन् ।

ठगी प्रकरणमा आफु पनि मुछिने भएपछि धनराजले कानूनी रुपमा ज्योतीसँग सम्बन्ध बिच्छेद गराइसकेका छन् । ठगीमा धनराजले समेत सघाएको भन्दै उनीविरुद्ध समेत उजुरी परेको हो । सूर्य थापा नेतृत्वको संसदीय बिशेष छानविन समितिमा समेत धनराजविरुद्ध यस विषयमा उजुरी परेको स्रोत बताउँछ ।

यसअघि रास्वपा सभापति रवि लामिछानेमाथि सहकारी ठगीको अभियोग लागेको छ । लामिछानेमाथि प्रहरीले अनुसन्धान गरिरहेको छ तर उनको मिलेमतो देखिने प्रष्ट प्रमाण भने फेला परेको छैन । ग्यालेक्सी टिभीको सञ्चालक हुँदा सहकारीको रकम हिनामिना गरेको अभियोग उनीमाथि छ ।