काठमाडौं । नेकपा माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले आइतबार बिहानका लागि आह्वान गरेको सर्वदलीय बैठक स्थगित गरेका छन् ।

अविरल वर्षापछि देशभर आएको बाढी र पहिरोले पु–याएको क्षतिबारे छलफल गर्न सरकारले अग्रसरता नलिएको भन्दै प्रचण्डले प्रमुख प्रतिपक्ष दलको नेताको हैसियतमा सर्वदलीय बैठक डाकेका थिए । तर  उनीपछि सरकारले पनि सर्वदलीय बैठक आह्वान गरेकाले उनले बैठक स्थगित गरेका हुन् ।

प्रचण्डको सचिवालयका सदस्य रमेश मल्लले सरकारीस्तरबाट सर्वदलीय बैठक आह्वान भएको सन्दर्भमा सोही प्रयोजन निम्ति अर्को बैठक जरुरत नभएकाले स्थगित गरिएको बताए ।

कार्यवाहक प्रधानमन्त्री प्रकाशमान सिंहले आह्वान गरेको सर्वदलीय बैठक अहिले दिउँसो १ बजे बस्दैछ ।