काठमाडौं । नेकपा (माओवादी केन्द्र) ले स्थानीय तहको उपनिर्वाचनमा गाउँपालिका अध्यक्षमा जित निकालेको छ । उपनिर्वाचनमा गाउँपालिका अध्यक्षमा माओवादीले पहिलो जित हासिल गरेको हो । यसअघि २०७९ को स्थानीय तह निर्वाचनमा त्यहाँ कांग्रेस विजयी हुँदा माओवादी तेस्रो बनेको थियो ।

मोरङको ग्रामथान गाउँपालिकाको अध्यक्षमा माओवादी केन्द्रका नमोनारायण माझी विजयी बनेका हुन् ।

नेपाली कांग्रेसका बलराम थारू सरदारलाई परास्त गर्दै माझी गाउँपालिका अध्यक्षमा विजयी बनेका हुन् । माझीले ६ हजार ९६९ मतका साथ जित दर्ता गराउँदा कांग्रेसका सरदार ५ हजार ३३३ मतमा रोकिए ।

त्यसैगरी, राष्ट्रिय प्रजातन्त्र पार्टीका दिनेशकुमार थन्दारले ५५५ र राष्ट्रिय स्वतन्त्र पार्टीका नवीनकुमार विश्वास खवासले ३७५ मत हासिल गरे ।

ग्रामथानमा २०७९ मा सम्पन्न स्थानीय तह निर्वाचनमा नेपाली कांग्रेसका जयप्रकाश गच्छदार थारू विजयी भएका थिए ।