काठमाडौं । गृह मन्त्रालयले नेपाल प्रहरीका दुई नायब महानिरीक्षकको बढुवा सिफारिस गरेको छ । मन्त्रालयको बढुवा सिफारिस समितिको बुधबार बसेको बैठकले प्रहरी नायब महानिरीक्षकद्वय कुवेर कडायत र रवीन्द्र केसीको प्रहरी अतिरिक्त महानिरीक्षकमा बढुवा सिफारिस गरेको हो ।

बढुवा समितिको सचिवालयले बुधबार एक सूचना प्रकाशित गर्दै रिक्त प्रहरी अतिरिक्त महानिरीक्षक बदमा बढुवाका लागि कडायत र केसीको नाम सिफारिस गरिएको जनाएको छ ।

बढुवा सिफारिस गरिएका कडायत प्रहरी प्रधान कार्यालयमा प्रहरी महानिरीक्षकको सचिवालयमा कार्यरत छन् भने केसी पनि प्रहरी प्रधान कार्यालयकै अन्वेषण योजना तथा विकास निर्देशनालयमा कार्यरत छन् ।