काठमाडौं । राष्ट्रिय आविष्कार केन्द्रका प्रमुख डा. महावीर पुनले नेपाल विद्युत् प्राधिकरणका कार्यकारी निर्देशक  कुलमान घिसिङलाई ऊर्जा मन्त्री दीपक खड्कासँग आगामी निर्वाचन लड्न सुझाव दिएका छन् ।

ऊर्जा मन्त्री खड्काले अनावश्यक दुःख दिएको उल्लेख गर्दै उनले कुलमानलाई आगामी निर्वाचन लडेर बदला लिन सुझाएका हुन् ।

‘आफूलाई दुःख दिने मन्त्रीकै क्षेत्रबाट अब आउने संघीय चुनावमा लडेर गुल्ट्याइ दिने आँट गर्न कुलमान घिसिङलाई सुझाव दिन्छु,’ पुनले सामाजिक सञ्जालमा लेखेका छन् ।

कार्यसम्पादन मूल्यांकनमा कुलमानलाई शून्य अंक दिने सचिव र सहसचिवमाथि पनि पुनले अाक्राेश पाेखेका छन् । ती कर्मचारीलाई विवेकहीनको संज्ञा दिँदै पुनले उनीहरूचाहिँ  शून्य अंकका हकदार भएकाे बताए । त्यस्ता कर्मचारीप्रति सचेत हुन आग्रह गर्दै उनले तिनले नेतालाई पंगु बनाएर देश नै डुबाउने आरोप लगाए ।

‘कुलमान घिसीङलाई ० नम्बर दिने सचिव र सहसचिवको टोलीलाई मैले –९९ नम्बर दिन्छु। त्यस्ता विवेकहीन कर्मचारीले देश डुवाउँछन् र नेताहरूलाई पंगु बनाउँछन्,’ पुनको ठम्याइ छ ।

कुशल व्यवस्थापकीय क्षमता प्रदर्शित गरेर नेपाललाई लोडसेडिङमुक्त पार्नुका साथै घाटा गएको नेपाल विद्युत् प्राधिकरणलाई केही समयदेखि सरकारले हटाउने तयारी गरिरहेको छ । त्यसकै लागि सरकारले उनको कार्यसम्पादनमा शून्य अंक दिएको छ भने पटक पटक विभिन्न आरोप लगाएर स्पष्टीकरण सोधेको छ । बिहीबार मात्रै पनि ऊर्जा मन्त्रालयले कुलमानलाई अर्को स्पष्टीकरणको पत्र पठाएको छ । कुलमानलाई हटाउन सरकारले सक्रियता बढाएपछि सदनदेखि सडकसम्म यसको विरोध भइरहेको छ ।