रुपन्देही, चैत्र १४ गते । प्रहरी चौकी, हाटी बनगाई दुगौलियामा कार्यरत प्रहरी नायब निरीक्षक खिम बहादुर खड्का घुस रकमसहित पक्राउ परेका छन् ।
भारतबाट रुपन्देही जिल्लाको दुगौलिया नाका हुँदै भन्सार छली अवैध रूपमा घरायसी प्रयोजनका सामान ल्याउन सहजीकरण गरिदिने भनी सेवाग्राहीसँग घुस/रिसवत माग गरिरहेको भन्ने सूचना एवं उजुरी निवेदनका आधारमा अख्तियार दुरुपयोग अनुसन्धान आयोगको कार्यालय, बुटवलबाट खटिई गएको टोलीले उनलाई पक्राउ गरेको हो ।

खड्काले सेवाग्राहीबाट रु. ३०,०००/- (तीस हजार रुपैयाँ) घुस  लिइसकेको अवस्थामा जिल्ला रुपन्देही, मायादेवी गाउँपालिका वडा नं. ६ अन्तर्गतबाट पक्राउ गरिएको अख्तियार दुरुपयोग अनुसन्धान आयोगले जनाएको छ ।

उनलाई नियन्त्रणमा लिई थप अनुसन्धान भइरहेको छ ।