काठमाडौं- बडादसैँ, तिहार र छठ पर्वका अवसरमा खाद्य व्यवस्था तथा व्यापार कम्पनी लिमिटेडले आजदेखि सहुलियत पसल सुरु गरेको छ। काठमाडौंमा थापाथलीमा सञ्चालित सहुलियत मूल्य पसल सञ्चालित छ।

लिमिटेडले आजदेखि सुरु गरेको सहुलियत पसलमा प्रतिकेजी पाँच, सात र १० रूपैयाँ छुट दिइएको सूचना अधिकारी माधव मिश्रले जानकारी दिए।

दाल, चामल, चिनी, गहुँका सामग्रीमा प्रतिकेजी पाँच रूपैयाँ छुट गरिएको छ। यसैगरी तेल, चिउरा, आँटा, पीठो, मैदालगायत सामग्रीमा प्रतिलिटर र प्रतिकेजी सात रूपैयाँ छुट दिइएको छ।

चियापत्ती, जिरा, धनियाँ, रैथाने खाद्य वस्तुलगायत सामग्रीमा प्रतिकेजी १० रूपैयाँ छुट गरिएको सूचना अधिकारी मिश्रले जानकारी दिए।

सहुलियत पसल छठसम्म सञ्चालन हुने जनाइएको छ।