काठमाडौं । गृह मन्त्रालयले प्राविधिक समूहतर्फका सशस्त्र प्रहरी नायब उपरीक्षक (डिएसपी) डा बिगिसा बस्नेतमाथिको कारबाही प्रक्रिया अघि बढाएको छ ।

गत साउन २१ गतेदेखि बिना जानकारी बस्नेत बिदामा बसेपछि गृहले उनीमाथि कारबाही प्रक्रिया अघि बढाएको हो ।

लामो समयसम्म आफू कार्यरत अस्पतालमा अनुपस्थित डा. बस्नेतसँग सम्पर्क स्थापित गर्न गरिएको प्रयास सफल नभएपछि सशस्त्र प्रहरी नियमावली, २०७२ अनुसार सफाइ पेश गर्न बोलाइएको गृह मन्त्रालयले जनाएको छ ।

नेपाल एपिएफ अस्पताल, बलम्बुमा कार्यरत डा. बस्नेत गत साउन २१ गतेदेखि बिनाजानकारी अनुपस्थित छिन् ।

सशस्त्र प्रहरी नियमावली, २०७२ मा कुनै पनि प्रहरी कर्मचारी बिनाजानकारी ९० दिन आफू कार्यरत कार्यालयमा अनुपस्थित रहेमा सेवाबाट हटाउन सक्ने व्यवस्था छ ।

गृहले डा. बस्नेतलाई विभागीय सजायको चेतावनी दिँदै त्यसो गर्न नपर्ने कुनै मनासिव कारण भए बाटाको म्याखबाहेक सात दिनभित्र सफाइ पेश गर्न भनेको छ । कात्तिक २० गतेको सचिवस्तरीय निर्णयानुसार उनलाई सफाइ पेश गर्ने मौका दिएको गृहले जनाएको छ ।

नेपाल प्रहरी, सशस्त्र प्रहरी, नेपाली सेनामा बीचमै जागिर छाड्ने प्रवृत्ति पछिल्ला केही वर्षदेखि बढ्दै गइरहेको छ । खासगरी तल्ला तहमा कार्यरत सुरक्षाकर्मीहरूले न्यून वेतन, आकर्षक वैदेशिक रोजगारीको अवसर जस्ता कारणले पेन्सन हुनुपूर्व सेवा छाड्ने गरेका छन् ।