काठमाडौँ । नेपाल नागरिक उड्डयन प्राधिकरणले आन्तरिक उडानमा न्यूनतम हवाई भाडा घटाएको छ।

आयल निगमले यही पुस १६ गते हवाई इन्धनको साबिक मूल्यमा प्रतिलिटर ६ रुपैयाँ घटाएको थियो। सोही आधारमा प्राधिकरणले शुक्रबारदेखि लागू हुने गरी विभिन्न गन्तव्यको हवाई भाडा घटाएको हो।

यसअघि प्रतिलिटर १३४ रुपैयाँ रहेको इन्धनको मूल्य (फ्युल सर्चाज) १२८ रुपैयाँ कायम गरी सोही आधारमा भाडा घटाइएको हो। प्राधिकरणले फ्युल सरचार्ज प्रतिसिट प्रतिमिनेट शुल्क ६८.०९ रुपैयाँ राखेको छ।

प्राधिकरणका अनुसार काठमाडौँबाट हुने पर्वतीय उडानहरूमा ४ हजार ६ सयबाट घटाएर न्यूनतम ४ हजार ३ सय ९० रुपैयाँ कायम भएको छ।

यसबाहेक काठमाडौँ–भद्रपुर ४ हजार २५ रुपैयाँबाट ३ हजार ८ सय ४५ रुपैयाँ, काठमाडौँ–विराटनगर ३ हजार २ सय १५ रुपैयाँबाट ३ हजार ७५ रुपैयाँ कायम भएको प्राधिकरणले जनाएको छ।