काठमाडौं- पूर्वप्रधानमन्त्री तथा नेकपा (एमाले) का अध्यक्ष केपी शर्मा ओलीले जाँचबुझ आयोगसमक्ष आफ्नो धारणा पेस गरेका छन्। आयोगको टोली उनको निवास गुण्डु पुगेर लिखित रूपमा बयान संकलन गरेर फर्किएको हो।

आयोगसम्बद्ध स्रोतका अनुसार ओलीलाई आयोगले औपचारिक पत्रमार्फत बयानका लागि जानकारी गराएको थियो। पत्र प्राप्त भएपछि ओलीले आयोगसँग सहकार्य गर्न तत्परता जनाएका थिए। त्यसअनुसार आयोगको टोली गुण्डु पुगेर उनको लिखित बयान लिएको स्रोतले जनाएको छ।

यसअघि आयोगमाथि नै प्रश्न उठाउँदै ओलीले सिंहदरबारमा उपस्थित भएर बयान दिन अस्वीकार गरेका थिए। तर पछिल्लो समय आफ्नो धारणा परिवर्तन गर्दै उनले आयोगका प्रतिनिधि आएमा निवासमै बयान दिन सकिने संकेत दिएका थिए। त्यही आधारमा आयोगको टोली उनको निवास पुगेको हो।

स्रोतका अनुसार ओलीले मौखिक रूपमा नभई लिखित रूपमा आफ्ना विचार, धारणा र आयोगले तयार पारेका प्रश्नहरूको जवाफ दिएका छन्। ती प्रश्नहरू घटनासँग सम्बन्धित विभिन्न बयान, प्रमाण र विवरणका आधारमा तयार गरिएको थियो।

आयोगले बयान प्रक्रियालाई गोप्य राखेको छ। आयोगका पदाधिकारीहरूले बयानका क्रममा सोधिएका प्रश्न र दिइएका जवाफबारे विस्तृत जानकारी सार्वजनिक नगर्ने बताएका छन्। स्रोतका अनुसार आयोगले सबै विवरण संकलन गरेर अन्तिम प्रतिवेदन तयार गर्ने तयारी गरिरहेको छ।