काठमाडौं – नेपाली बजारमा सुनको मूल्यले नयाँ इतिहास रचेको छ। नेपाल सुनचाँदी व्यवसायी महासंघका अनुसार आज सुनको मूल्य प्रतितोला ३ लाख १ हजार ४ सय रुपैयाँ पुगेको छ, जुन अहिलेसम्मकै उच्च दर हो।

अघिल्लो दिन घटेको सुनको भाउ आज एकाएक उकालो लागेको हो। एकैदिन प्रतितोला ९ हजार २ सय रुपैयाँले बढेपछि सुन तीन लाखको सीमाभन्दा माथि पुगेको हो। हिजो भने सुन प्रतितोला २ हजार ९ सय रुपैयाँले घट्दै २ लाख ९२ हजार २ सय रुपैयाँमा कारोबार भएको थियो।

सुनसँगै चाँदीको मूल्य पनि उकालो लागेको छ। आज चाँदी प्रतितोला ६ हजार १९० रुपैयाँमा कारोबार भइरहेको छ, जुन अघिल्लो दिनको तुलनामा ३२० रुपैयाँ बढी हो। हिजो चाँदीको मूल्य ५ हजार ८७० रुपैयाँ रहेको थियो।

लगातारको मूल्यवृद्धिले सुनचाँदी बजारमा लगानीकर्ता र उपभोक्ताको चासो बढ्दै गएको छ।