काठमाडौं । राष्ट्रिय स्वतन्त्र पार्टीका वरिष्ठ नेता एवं झापा क्षेत्र नं. ५ का प्रतिनिधिसभा सदस्य उम्मेदवार बालेन साहले नेकपा (एमाले) का अध्यक्ष केपी शर्मा ओलीसँग बहस गर्न इन्कार गरेका छन् । ओली ७६ जना बालबालिकाका हत्यारा भएकाले उनीसँग एउटै मञ्चमा उभिएर आफूले बहस गर्न नसक्ने उनको भनाइ छ । साथै उनले गत भदौ २३ गतेको हत्या आतंक लुकाउन ओलीले नै २४ गतेको विध्वंश मच्चाएको आरोप पनि लगाएका छन् ।

दलहरूले सार्वजनिक गरेका भावी प्रधानमन्त्रीका उम्मेदवारलाई एकै ठाउँमा राखेर सार्वजनिक बहस गराउनु पर्ने माग चलिरहँदा ओलीले सामाजिक सञ्चालमार्फत आफू त्यसका लागि तयार भएको बताएका थिए । ओलीकै फेसबुक पोस्ट्मा प्रतिक्रिया दिँदै बालेनले ओलीसँग पब्लिक डिबेट गर्न नसकिने प्रष्ट पारेका हुन् । जेन–जी आन्दोलनका क्रममा मारिएका ७६ जनाको हत्यारा र उसको मतियारसँग एउटै मञ्चमा उभिनु भनेको त्यसमा सामेल भएको रूपमा बुझिने बालेनको भनाइ छ ।

‘७६ जना बच्चाको हत्यारा र उसको मतियारसँग एउटै मञ्चमा उभिनु भनेको म पनि त्यसमा सामेल भएको रूपमा बुझिनेछ,’ ओलीको स्ट्याटसको मुनि बालेनले प्रतिक्रिया जनाएका छन् ।

प्रधानमन्त्रीका उम्मेदवारबीच पब्लिक डिबेट गराउनेबारे कांग्रेस सभापति गगन थापाले भने अहिलेसम्म कुनै प्रतिक्रिया जनाएका छैनन् । कांग्रेसले गगनलाई प्रधानमन्त्रीका रूपमा अघि सारेर निर्वाचनमा जाने निर्णय गरिसकेको छ ।

त्यस्तै, बालेनले २३ गतेको हत्या आतंक लुकाउन ओलीहरूले नै २४ गतेको आगजनी गराएको आरोप लगाएका छन् । ओलीले सुरुदेखि नै २४ गतेको आगजनीको घटना बालेनलगायतको उक्साहटमा भएको आरोप लगाउँदै आइरहेका छन् ।

बालेनले ओलीलाई आफूलाई कहिले आतंकवादी स्वीकार गर्ने भन्ने प्रश्नसमेत गरेका छन् । ओलीले आफूलाई आतंकवादी स्वीकार गरेपछि मात्रै थप कुरा गर्ने बालेनको भनाइ छ ।

तपाईंहरूले आफैं २३ गते बच्चाहरू मारेको आतङ्कवाद लुकाउन २४ गत्ते जलाएको हो । आफूलाई आतङ्कवादी चाहिँ कहिले स्वीकार्ने हो ? त्यसपछि अरू कुरा गरौँला,’ बालेनले भनेका छन् ।