इजरायली सेनाले दक्षिणी र पूर्वी लेबनानमा गरेको भीषण हवाई आक्रमणमा दर्जनौँ मानिसको ज्यान गएको छ। इजरायली प्रधानमन्त्री बेन्जामिन नेतन्याहुले हिजबुल्लाहविरुद्ध सैन्य कारबाही अझ तीव्र बनाउने घोषणा गरेपछि यी आक्रमणहरू भएका हुन्।

लेबनानको स्वास्थ्य मन्त्रालयका अनुसार पछिल्लो आक्रमण श्रृंखलामा कम्तीमा ३१ जनाको मृत्यु भएको छ, जसमा केही बालबालिकासमेत रहेका छन्। साथै सयौं जना घाइते भएको जनाइएको छ। इजरायली सेनाले आफूले हिजबुल्लाहका १०० भन्दा बढी पूर्वाधार र लडाकु केन्द्रलाई लक्ष्य बनाएर आक्रमण गरेको जनाएको छ। अमेरिकाको मध्यस्थतामा गत अप्रिलको मध्यतिर लागू भएको युद्धविरामपछि यो सबैभन्दा भीषण बमबारी हो।

सोमबार नेतन्याहुले हिजबुल्लाहमाथिको कारबाहीमा ‘झन् कडा रूपमा अघि बढ्न’ निर्देशन दिएको बताएका थिए। मंगलबार सुरक्षा मन्त्रिपरिषद्को बैठकमा बोल्दै उनले इजरायल ‘लेबनानमा आफ्नो सैन्य अभियानलाई अझ गहिरो बनाइरहेको’ बताए।

उनले भने, ‘आईडीएफ (इजरायल डिफेन्स फोर्स) ठूलो संख्यामा स्थलसेनासहित सक्रिय छ र रणनीतिक रूपमा महत्वपूर्ण भूभाग आफ्नो नियन्त्रणमा लिइरहेको छ।’ साथै, उत्तरी इजरायलका बासिन्दालाई हिजबुल्लाहको आक्रमणबाट जोगाउन सुरक्षा क्षेत्रलाई थप मजबुत बनाइँदै लगिएको बताएको छ। अमेरिकाको मध्यस्थतामा भएको युद्धविराम दुवै पक्षबाट पटक-पटक उल्लंघन हुँदै आएको छ, जसले अमेरिका, इजरायल र इरानबीच युद्ध अन्त्य गर्न भइरहेका जटिल वार्तालाई जोखिममा पारिरहेको छ।

इजरायलले विशेषगरी दक्षिणी लेबनानमा दैनिकजसो हवाई तथा तोप आक्रमण जारी राखेको छ भने हिजबुल्लाहले उत्तरी इजरायलका बस्तीहरू र दक्षिणी लेबनानमा तैनाथ इजरायली सैनिकहरूलाई लक्षित गर्दै रकेट र ड्रोन आक्रमण गरिरहेको छ।

स्थानीय सञ्चारमाध्यमका अनुसार हवाई आक्रमणहरू बेक्का उपत्यकाको मशघारा गाउँ तथा दक्षिणी लेबनानको बुर्ज अल-शमाली क्षेत्रमा केन्द्रित थिए। केही आक्रमणहरू लगभग ९०० वर्ष पुरानो ऐतिहासिक किल्ला बउफोर्ट क्यास्टली नजिक पनि भएका थिए। संयुक्त राष्ट्रसंघको सांस्कृतिक निकाय युनेस्कोले यसलाई ‘मध्ययुगीन किल्लाहरूको उत्कृष्ट रूपमा सुरक्षित उदाहरणमध्ये एक’ भनेर मान्यता दिएको छ।