समीक्षा अवधिमा कम्पनीको कुल सञ्चालन आय ८ अर्ब ६७ करोड ८२ लाख रुपैयाँ पुगेको छ, जुन गत वर्षको तुलनामा ०.०१ प्रतिशतले बढी हो। यस अवधिमा कम्पनीको वार्षिकीकृत प्रति सेयर आम्दानी (ईपीएस) ४० रुपैयाँ ४५ पैसा कायम भएको छ। तलब स्केल समायोजनका कारण कर्मचारी खर्च बढे पनि ह्रास खर्चमा कमी र मूल्यह्रास क्षति फिर्ता समायोजनका कारण खुद खर्च ५.९० प्रतिशतले घटेको टेलिकमले जनाएको छ।

प्राकृतिक विपद्का कारण कम्पनीको सेवा र राजस्वमा भने प्रतिकूल असर परेको छ। भदौ १० मा रसुवाको भोटेकोशी क्षेत्रमा आएको बाढी र असोज २५ मा बुढीगण्डकी नदीमा आएको बाढीका कारण सेवा अवरुद्ध हुँदा व्यावसायिक गतिविधिमा प्रभाव परेको थियो। प्रभावित क्षेत्रका सेवाग्राहीलाई १७ दिनसम्म निःशुल्क डेटा तथा भ्वाइस सेवा उपलब्ध गराउँदा राजस्व प्रभावित भएको कम्पनीले उल्लेख गरेको छ।

यसका बाबजुद जीएसएम र एफटिटिएच सेवातर्फको कार्य सञ्चालन राजस्वमा भएको वृद्धिले सहयोग पुर्‍याएको छ। कम्पनीको कर अघिको नाफा गत वर्षको तुलनामा ३.६५ प्रतिशतले बढेर २ अर्ब ९८ करोड ७४ लाख रुपैयाँ पुगेको छ। टेलिकमले दुर्गम क्षेत्रमा सेवा विस्तार र गुणस्तर सुधारलाई आफ्नो प्राथमिकतामा राख्दै सेवा प्रवाहलाई निरन्तरता दिइरहेको जनाएको छ।