एनपीएलका आठै टोलीका लागि फ्लडलाइटसहितका छुट्टाछुट्टै क्रिकेट रंगशाला बनाइने
काठमाडौं । प्रधानमन्त्री बालेन शाहले नेपाल प्रिमियर लिग (एनपीएल) का आठवटै टोलीका लागि छुट्टाछुट्टै क्रिकेट रंगशाला निर्माण गर्ने घोषणा गरेका छन्। उनले एनपीएलको छैटौँ संस्करणदेखि प्रतियोगिता होम एन्ड अवे प्रणालीमा सञ्चालन गर्ने लक्ष्यसहित रंगशाला निर्माण अघि बढाइने बताएका हुन्।
शनिबार सामाजिक सञ्जालमार्फत आफ्नो धारणा सार्वजनिक गर्दै प्रधानमन्त्री शाहले आठवटै क्लबका लागि फ्लडलाइटसहितका क्रिकेट रंगशाला निर्माण गरिने जानकारी दिएका छन्। उनका अनुसार रंगशाला निर्माणको जिम्मेवारी नेपाल सरकारको पूर्वाधार विकास मन्त्रालयले लिनेछ।
प्रधानमन्त्री शाहले सुदूरपश्चिम रोयल्सको घरेलु मैदानका रूपमा रहने फाप्ला क्रिकेट रंगशालाको निर्माण प्रक्रिया अघि बढिसकेको बताएका छन्। साथै, आगामी तीन महिनाभित्र अन्य सातवटै रंगशालाको निर्माण प्रक्रिया पनि अगाडि बढाइने उनको भनाइ छ।
सरकारको योजनाअनुसार विराटनगर किंग्सका लागि बैजनाथपुर क्रिकेट रंगशाला, लुम्बिनी लायन्सका लागि सिद्धार्थ क्रिकेट रंगशाला र कर्णाली याक्सका लागि सुर्खेत क्रिकेट रंगशाला निर्माण गरिनेछ।
त्यस्तै, सुदूरपश्चिम रोयल्सका लागि फाप्ला क्रिकेट रंगशाला, काठमाडौं गुर्खाजका लागि कीर्तिपुर क्रिकेट मैदान, पोखरा एभेन्जर्सका लागि पोखरा क्रिकेट रंगशाला, जनकपुर बोल्ट्सका लागि रामजानकी क्रिकेट रंगशाला र चितवन राइनोजका लागि गौतमबुद्ध क्रिकेट रंगशाला निर्माण गर्ने योजना छ।
यी पूर्वाधार निर्माण सम्पन्न भएपछि एनपीएलका खेल होम एन्ड अवे प्रणालीमा सञ्चालन गर्न सहज हुने अपेक्षा गरिएको छ। यसले क्लबहरूलाई आफ्नै घरेलु मैदानमा खेल्ने अवसर प्रदान गर्नुका साथै देशका विभिन्न क्षेत्रमा क्रिकेटको गतिविधि विस्तार गर्न सहयोग पुग्ने विश्वास गरिएको छ।
प्रधानमन्त्री शाहले एनपीएल विजेता सुदूरपश्चिम रोयल्सलाई बधाई दिँदै नेपाली क्रिकेटको व्यावसायिक विकास र विस्तारका लागि आवश्यक पूर्वाधार निर्माण गर्न सरकार प्रतिबद्ध रहेको बताएका छन्।
यद्यपि, प्रस्तावित रंगशालाहरू निर्माण सम्पन्न हुने निश्चित समयसीमा र छैटौँ संस्करणदेखि नै होम एन्ड अवे प्रणाली लागू गर्ने विषयमा विस्तृत कार्ययोजना भने सार्वजनिक हुन बाँकी छ।
ताजा अपडेट
-
एनपीएलमा चितवनका रिजन सर्वोत्कृष्ट खेलाडी घोषित
-
एनपीएलका आठै टोलीका लागि फ्लडलाइटसहितका छुट्टाछुट्टै क्रिकेट रंगशाला बनाइने
-
मन्सेको कीर्तिमानी शतकमा सुदूरपश्चिमले जित्यो एनपीएलको उपाधि
-
एनपीएल फाइनल: लुम्बिनीले सुदूरपश्चिमसामु राख्यो १५६ रनको लक्ष्य
-
एनपीएल फाइनलका दिन सुदूरपश्चिमका क्रिकेटप्रेमीलाई खुसीको खबर

प्रतिक्रिया