काठमाडौं । लुम्बिनीको रिक्त राष्ट्रियसभा सदस्यका लागि आज उपनिर्वाचन हुँदैछ ।

नेकपा एमालेबाट राष्ट्रियसभा सदस्यमा निर्वाचित खिमलाल भट्टराईले राजीनामा दिएपछि रिक्त हुन पुगेको सिटमा बुधबार उपनिर्वाचन हुन लागेको हो ।

निर्वाचनका लागि दाङको घोराहीस्थित कर्मचारी मिलन केन्द्रलाई मतदान केन्द्र तोकिएको छ ।

राष्ट्रिय सभा सदस्यका लागि तीन उम्मेदवार आमनेसामने छन् ।

सत्तारूढ दलका तर्फबाट एमालेका कुमार दसौदी, कांग्रेसबाट माधवप्रसाद आचार्य र नागरिक उन्मुक्ति पार्टीबाट राजेन्द्रवीर राय उम्मेदवार छन् । नागरिक उन्मुक्ति पार्टीले सरकारलाई समर्थन गरेको भए पनि उम्मेदवारी दिएको छ ।

रष्ट्रियसभा सदस्य निर्वाचनका लागि प्रदेशसभा सदस्य र पालिकाका प्रमुख तथा उपप्रमुख मतदाता हुने संवैधानिक व्यवस्था छ ।