काठमाडौं । राष्ट्रपति निर्वाचनका लागि मतदान सुरु भएको छ । निर्वाचन आयोगको निर्धारित समयतालिकाअनुसार अहिले बिहान १० बजेबाट नयाँ बानेश्वरस्थित अन्तर्राष्ट्रिय सम्मेलन केन्द्रको ल्होत्से हलमा मतदान सुरु भएको हो ।

नयाँ राष्ट्रपतिका लागि अहिले बिहान १० बजेबाट मतदान सुरु भएको जनाएको छ । मतदान दिउँसो ३ बजेसम्म चल्नेछ ।

निर्वाचनमा प्रतिनिधिसभा, राष्ट्रियसभा र प्रदेशसभाका सदस्य मतदाता रहनेछन् । संघीय संसदमा ३३२ र प्रदेश संसदमा ५५० सांसदले आफ्नो मतद्वारा आगामी पाँच वर्षका लागि राष्ट्रपति चयन गर्ने छन् । संघीय सांसदको एक मतबराबर ७९ र प्रदेश सांसदको एक मतबराबर ४८ मतभार कायम गरिएको छ ।

निर्वाचनमा कांग्रेस, माओवादी सम्मिलित आठदलीय गठबन्धनबाट रामचन्द्र पौडेल र एमालेका तर्फबाट सुवासचन्द्र नेम्वाङ छन् ।

निर्वाचन आयोगका अनुसार, मतदान सकिएलगत्तै मतगणना सुरु हुनेछ । यसको अन्तिम नतिजा साँझ ६ बजेभित्र सार्वजनिक गर्ने आयोगको तयारी छ ।