काठमाडौं । पूर्वप्रधानमन्त्री एवं एमालेका अध्यक्ष केपी ओलीले तत्कालीन महासचिव मदन भण्डारीको हत्यासम्बन्धमा समय आएपछि सत्यतथ्य सार्वजनिक गर्ने जिकिर गरेका छन् ।

मदन–आश्रितको ३० औं स्मृति दिवसमा बल्खुमा आयोजित कार्यक्रमलाई सम्बोधन गर्दै उनको कहाँ कसरी हत्या भएको थियो, त्यो सबैको समयक्रममा खोजी हुने जिकिर गरेका हुन् ।

केही समयअघि पुराना कांग्रेसका नेता उमेश गिरीले दिएको अन्तर्वार्ताको प्रशंग कोट्याउँदै ओलीले भने, ‘कहाँ र कसरी उहाँहरुको हत्या भएको थियो, त्यस सन्दर्भमा उमेश गिरीले एउटा अन्तर्वार्ता दिनुभएको थियो केही अगाडि । त्यसमा उहाँले मदन भण्डारीको हत्या गर्ने काम मलाई जिम्मा दिन खोजिएको थियो तर, मैले जिम्मा लिन मानिनँ भनेर खुलस्त पार्नुभएको छ । फलानाले बोलाएर मलाई यसो भनेका थिए भनेर नामै तोक्नुभएको छ । यो सबैको समयक्रममा खोजी हुनेछ । सत्यतथ्य बाहिर आउनेछन् ।’

३ जेठ, २०५० सालमा तत्कालीन एमालेका महासचिव रहेका भण्डारी र संगठनविभाग प्रमुख जीवराज आश्रितको चितवनकाे दासढुंगामा रहस्यमय दुर्घटनामा परि निधन भएको थियो । मदनको हत्या हो कि दुर्घटना हो भन्ने विषय अहिलेसम्म रहस्यमय छ ।

मदनको निधनपछि एमालेबाट तीन जना प्रधानमन्त्री भइसकेका छन् । उनकै धर्मपत्नी विद्यादेवी भण्डारी ७ वर्ष राष्ट्रपति भएर भर्खरै घर फर्केकी छिन् । २०७४ मा ओली दुई तिहाइका शक्तिशाली प्रधानमन्त्री रहेका ओलीले यसविषयमा कुनै प्रक्रियासमेत अघि बढाएका थिएनन् ।