काठमाडौं । जनमत पार्टीका अध्यक्षसमेत रहेका सांसद डा. सीके राउतले सरकारले ल्याएको बजेट संशोधन नभए पास हुन नदिने चेतावनी दिएका छन् ।

सोमबार प्रतिनिधिसभाको बैठकमा बोल्दै उनले बजेट सम्बोधन गर्न सरकारलाई चेतावनी दिएका हुन् ।

‘मन्त्री बन्दैमा अहंकार देखाउनुपर्छ भन्ने पनि होइन । एकजनाले बजेट निर्माण गर्ने भए यति धेरै सांसदहरू किन आवश्यक पर्ने थियो’, उनले भने, ‘त्यसैले मन्त्रालयले सांसदहरूको कुरा सुनिदिनुपर्छ । सरकारले सुनेन भने त्यो बजेटलाई पारित हुन नदिने अधिकार सांसदहरूलाई छ ।’

आर्थिक वर्ष २०८०/८१ को बजेट सरकारले जेठ १५ गते संसदमा प्रस्तुत गरेको थियो । बजेट विनियोजनलाई लिएर सत्ता पक्षकै सांसदहरू असन्तुष्ट देखिएका छन् ।