काठमाडौं । काठमाडौं महानगरपालिकाले हनुमानढोका दरबार क्षेत्रभित्र सवारी आवागमनमा रोक लगाएको छ । योसँगै अब यो क्षेत्रमा यातायातका साधन गुड्न नपाउने भएका छन् ।

हनुमानढोका दरबार क्षेत्रमा दैनिक हजारौं पर्यटकको आवागमन हुने भएकाले त्यहाँको मौलिकता, सौन्दर्य र परिसरको वातावरण शान्त, स्वच्छ र सुरम्य राख्न सवारी आवागमन निषेध गरिएको महानगरपालिकाका प्रमुख (मेयर) बालेन शाहले बताए ।

‘वसन्तपुर हनुमानढोका क्षेत्रमा दिनमा हजारौं पर्यटकहरू आउने र लाखौं आउन सक्ने सम्भावना छ । यिनीहरूको मौलिकता, सौन्दर्य र परिसरको वातावरण शान्त, स्वच्छ र सुरम्य हुन अत्यावश्यक छ,’ शाहले यो क्षेत्रमा सवारी आवागमन निषेध गर्नुको कारण प्रष्ट्याउँदै सामाजिक सञ्जालमा लेखेका छन्, ‘यसैले हनुमानढोका परिसरभित्र सवारी साधनहरुलाई निषेध गरिएको छ ।’

काठमाडौ मुख्य रूपमा प्राचीन र ऐतिहासिक कालीगढीको उदाहरण भएको र यहाँको पहिचान भनेकै सम्पदाहरू भएकाले त्यसलाई विश्वसमक्ष गौरवसाथ देखाउन सक्ने बनाउनुपर्ने बालेनको भनाइ छ । यसलाई व्यवस्थित गर्दा लाखौं पर्यटक भित्रिने उनले बताए ।