काठमाडौं । अख्तियार दुरूपयोग अनुसन्धान आयोगले विद्यालय हाताभित्रको जग्गाको माटो उत्खनन गरेर इँटा उद्योगलाई विक्री गर्ने चारजनाविरूद्ध भ्रष्टाचार मुद्दा दायर गरेको छ ।

कञ्चनपुरस्थित लालझाडी गाउँपालिका वडा नं ४ मा पर्ने बैजनाथ बहुभाषिक आभारभूत विद्यालयको हाताभित्रको माटो उत्खनन गरी विक्री भएको पाइएको हो ।

आयोगले विद्यालयका प्रधानाध्यापक सुरेन्द्रबहादुर बोहरा, विद्यालय व्यवस्थापन समितिका तत्कालीन अध्यक्ष लक्ष्मण राना, भगवती इँटा उद्योगका व्यवस्थापन राजेन्द्रबहादुर भाट र सिद्ध वैजनाथ इँटा उद्योगका सञ्चालक धनबहादुर विष्टविरुद्ध विशेष अदालत काठमाडौंमा मुद्दा दायर गरेको छ ।

उनीहरूले विद्यालय डाङाजाईको हाताभित्रको माटो उत्खनन गरी जमिन समथर र पोखरी निर्माण गर्दा ७ लाख २९ हजार ५१४ रुपैयाँ भ्रष्टाचार गरेको जनाइएको छ ।

आयोगले तत्कालिन अध्यक्ष राना र प्रधानाध्यापकलाई सजायस्वरुप ७ लाख २९ हजार ५१४ रुपैयाँ बिगो जरिवानासहित सजाय मागदाबी गरेको छ ।

त्यस्तै, माटो खरिद गर्ने उद्योगका व्यवस्थापक भाटलाई ४ लाख ११ हजार ६०६ रुपैयाँ र प्रोपराइटर विष्टलाई ३ लाख १७ हजार ९०८ रूपैयाँ बिगो जरिवाना मागदाबी गरेको छ ।