काठमाडौं । इजरायलमा रहेका नेपाली विद्यार्थीलाई आज स्वदेश ल्याइने भएको छ । हमासको आक्रमणपछि इजरायलबाट स्वदेश फर्कंन चाहेका विद्यार्थीलाई सरकारले आज उद्धार गर्न लागेको हो ।

इजरायलस्थित नेपाली राजदूतावासले पहिलो चरणमा त्यहाँ रहेका २५४ नेपाली विद्यार्थीको उद्धार गर्न लागिएको जनाएको छ । इजरायलबाट स्वदेश फर्कंन चाहने नेपालीको संख्या धेरै भएपछि पहिलो चरणमा विद्यार्थीको उद्धार गर्न लागिएको हो ।

नेपाली विद्यार्थीको उद्धारका लागि बिहीबार बिहान २ः३० बजे परराष्ट्रमन्त्री एनपी साउदको नेतृत्वमा नेपाल वायु सेवा निगमको जहाज त्यसतर्फ प्रस्थान गरेको छ । बुधबार बसेको मन्त्रीपरिषद् बैठकले परराष्ट्रमन्त्री साउदको नेतृत्वमा उद्धार टोली इजरायल पठाउने निर्णय गरेको थियो ।

उनीहरूलाई लिएर बिहीबार नै बेलुकी ८ः२० बजे त्रिभुवन अन्तर्राष्ट्रिय विमानस्थल आइपुग्ने तयारी छ ।

इजरायलबाट स्वदेश फर्कंन चाहेका अन्य नेपालीलाई भने अर्को चरणमा ल्याइने भएको छ । हमासको आक्रमणमा मारिएका १० विद्यार्थीको शव पनि अर्को चरणमा ल्याउने तयारी छ ।

गत साता हमासले इजरायलमा हठात आक्रमण गरेर जनधनको क्षति गराएको थियो । आक्रमणमा लर्न एण्ड अर्न कार्यक्रमअन्तर्गत इजरायल पुगेका १० नेपालीको मृत्यु भएको थियो ।