काठमाडौं । घुस लिएको आरोपमा पोखरा महानगरपालिकाका एक इञ्जिनियर पक्राउ परेका छन् । महानगरपालिकाको घर नक्सा शाखाका इञ्जिनियर शिवराज बराललाई अख्तियार दुरूपयोग अनुसन्धान आयोग पोखराको टोलीले मंगलबार नियन्त्रणमा लिएको हो ।

उनीमाथि घुस रकम लिएर सेवाग्राहीलाई घर नक्सा प्रमाणपत्र जारी गरेको आरोप छ । यसअघि गत चैत २८ गते घर निर्माणको घर नक्सा प्रमाणपत्र दिने क्रममा सब इन्जिनियर उषाकिरण रोकाया र गोदार इन्जिनियरिङ कन्सल्टेन्सी सेवाका सुरज कुँवरलाई अख्तियारले १ लाख ५० हजार रूपैयाँ नगदसहित पक्राउ गरेको थियो ।

पक्राउ परेका बराललाई अहिले अख्तियार दुरूपयोग अनुसन्धान आयोग, केन्द्रीय कार्यालयमा राखिएको छ ।