काठमाडौं । ज्येष्ठ पत्रकार वृत्तिका लागि सरकारले आवेदन माग गरेको छ । सूचना तथा प्रसारण विभागले पत्रकार वृत्तिकोष तथा सञ्चालन निर्देशिका, २०७५ तथा पत्रकार वृत्तिकोष सञ्चालन मापदण्ड, २०७८ अनुसार आवेदन माग गरेको हो ।

आवेदनसँगै ३० वर्षसम्म निरन्तर पत्रकारिता गरेको पुष्टि हुने लगायत कागजात पेश गर्नुपर्नेछ ।

त्यसैगरी, द्वन्द्वपीडित पत्रकार र द्वन्द्वमा परी मृत्यु भएका पत्रकारका परिवारका सदस्यलाई पनि मासिक वृत्तिका लागि आवेदन दिन भनिएको छ । तर उनीहरूले यस्तो वृत्ति प्राप्त गर्न द्वन्द्वपीडित भएको खुल्ने कागजपत्र पेश गर्नुपर्नेछ ।

आगामी ४० दिन अर्थात् ०८१ पुस १६ गतेसम्म सूचना तथा प्रसारण विभागमा लिखित तथा अनलाइन दुवै माध्यमबाट आवेदन दिन सकिनेछ ।

आवेदन स्वीकृत भएका व्यक्तिलाई सरकारले मासिक रूपमा वृत्ति उपलब्ध गराउनेछ ।