काठमाडौं । राजावादीहरूले आज काठमाडौंमा शक्ति प्रदर्शन गर्दैछन् । शक्ति प्रदर्शनलाई लिएर राजधानीको सुरक्षा व्यवस्था बिहानैदेखि कडा पारिएको छ ।

पूर्वराजा ज्ञानेन्द्र शाह पोखराबाट काठमाडौं फर्कंन लागेको छेको पारेर राजावादीहरूले आइतबार उनको स्वागतसँगै प्रदर्शन गर्न लागेका हुन् ।

राष्ट्रिय प्रजातन्त्र पार्टी (राप्रपा) ले दिउँसो ३ बजे पूर्वराजा ज्ञानेन्द्र त्रिभुवन अन्तर्राष्ट्रिय विमानस्थल हुँदै काठमाडौं ओर्लन लागेको जानकारी दिँदै उनको स्वागतका लागि उपस्थित हुन सबैमा आग्रह गरेको छ । राजसंस्थावादी अन्य संघ–संगठनले पनि यसैगरी राजाको स्वागत कार्यक्रममा सहभागी भइदिन विभिन्न पेशाकर्मी, सर्वसाधारणलगायतलाई आह्वान गरेका छन् ।

विमानस्थलमा पूर्वराजालाई स्वागत गरेर त्यहाँबाट नारावाजीसहित निर्मल निवास लैजाने उनीहरूको तयारी छ ।

राजावादीहरूको आइतबारको प्रदर्शनलाई मध्यनजर गरेर काठमाडौंको सुरक्षा व्यवस्था कडा पारिएको छ ।

पछिल्लो केही सातायता नेपालमा राजावादीहरू निकै सक्रिय बन्न थालेका छन् । राजतन्त्र पुनस्र्थापना हुनुपर्ने मागसहित राजावादीहरू सक्रिय हुन थालेपछि राजनीति तरंगित बन्न पुगेको छ ।