काठमाडौं । मकवानपुरको हेटौंडामा देवरले भाउजूको बीभत्स हत्या गरेका छन् । आक्रमणबाट उनका दाइसमेत गम्भीर घाइते भएका छन् ।

हेटौंडा उपमहानगरपालिका–१, चौकीटोलकी गुडिया दासको गएराति ९ बजे आफ्नै देबर २३ वर्षीय राहुल भनिने रमेश दासले हत्या गरेका हुन् ।

टाउकोमा गम्भीर चोट लागेको अवस्थामा घरको दोस्रो तलामा दासको शव फेला परेको जिल्ला प्रहरी कार्यालय, मकवानपुरले जनाएको छ ।

दासले आफ्नै माइला दाजुलाई पनि खुकुरी प्रहार गरेर गम्भीर घाइते बनाएका छन् । उनको अहिले मकवानपुरकै सहकारी अस्पतालमा उपचार भइरहेको छ ।

प्रहरीले दासलाई खुकुरी लिएकै अवस्थामा बुधबार राति नै पक्राउ गरिसकेको छ ।

तीन सन्तानकी आमा गुडियाका श्रीमान् वैदेशिक रोजगारीका लागि कतारमा छन् । घरायसी विवादका कारण उनको हत्या भएको बताइए पनि प्रष्ट भइनसकेको र यसबारे अनुसन्धान चलिरहेको प्रहरी भनाइ छ ।