काठमाडौं । सहसचिव शोभाकान्त पौडेलको सचिवमा बढुवा भएको छ । बुधबार बसेको मन्त्रिपरिषद् बैठकले पौडेललाई सचिवमा पदोन्नति गर्ने निर्णय लिएको हो ।

विनोद सिंह गत बुधबार अवकाशमा गएपछि सचिवको एक पद रिक्त थियो । सोही रिक्त पदमा सरकारले पौडेललाई पदोन्नति गरेको हो ।

बुधबार बसेको मन्त्रिपरिषद् बैठकले रिक्त सचिव पदमा पौडेललाई बढुवा गर्ने निर्णय गरेको सरकारका एक मन्त्रीले जानकारी दिए ।

पौडेलको नाम यसअघि पनि सचिव बढुवाको सूचीमा परेको थियो । तर तीन जनाको नाम सिफारिस हुँदा पौडेल रोजाइमा पर्न सकेका थिएनन् ।

पौडेलसँग भन्सार विभागको महानिर्देशक, धितोपत्र बोर्डको अध्यक्ष, नेपाल पुनर्बीमा कम्पनीको अध्यक्षलगायत जिम्मेवारी सम्हालेको अनुभव छ ।