काठमाडौँ। अख्तियार दुरुपयोग अनुसन्धान आयोगले मालपोत हाकिमसहित २ कर्मचारीविरुद्ध भ्रष्टाचार मुद्दा दायर गरेको छ ।

भक्तपुरस्थित भूमि सुधार तथा मालपोत कार्यालयका प्रमुखसहित दुई कर्मचारीविरुद्ध २४ लाख ५० हजार रुपैयाँ घुस लिएको आरोपमा विशेष अदालतमा मुद्दा दायर गरिएको हो ।

चाँगुनारायण नगरपालिका मा रहेको १४ रोपनी ४ आना क्षेत्रफलको जग्गा मोही र लगत कट्टा गरी मोहीको नाममा प्रमाण पुर्जा बनाउने प्रयोजनका लागि घुस मागिएको उजुरीका आधारमा आयोगले अनुसन्धान अघि बढाएको थियो ।

अनुसन्धानको क्रममा अख्तियारको टोलीले भूमि सुधार तथा मालपोत कार्यालय, भक्तपुरका प्रमुख मालपोत अधिकृत कुमार आचार्य र कार्यालय सहयोगी टिकाराम राउतलाई नियन्त्रणमा लिएको थियो । आचार्य र राउतको साथबाट मोबाइल सहित घुस बापत लिएको भनिएको २४ लाख ५० हजार समेत बरामद गरिएको हो ।

सेवाग्राहीसँग मिलेमतोमा जग्गाको मोही बाँडफाँड तथा नामसारी प्रक्रियालाई सहजीकरण गर्ने बहानामा उक्त घुस रकम मागिएको पुष्टि भएको आयोगका प्रवक्ता एवं सहसचिव राजेन्द्रकुमार पौडेलले जानकारी दिए ।