काठमाडौं । हाइटीको राजधानी पोर्ट-ओ-प्रिन्सको व्यस्त सडकमा एउटा सानो विमान बुधबार दुर्घटना हुँदा पाइलटसहित कम्तीमा छ जनाको मृत्यु भएको अधिकारीहरूले बताएका छन् ।

विमान पोर्ट ओ प्रिन्स एयरपोर्टबाट हाइटियन सहर ज्यामेलको लागि उडेकाे थियाे । नागरिक उड्डयन कार्यालयका अनुसार विमानको इन्जिन फेल भएका कारण दुर्घटना भएकाे हाे ।

विमानमा पाइलटसहित ६ जना सवार थिए । सडकमा विमान खस्दा एक माेटरसाइकल चालककाे पनि मृत्यु भएकाे छ र सडकमा हिँडिरहेका अन्य ६ जना घाइते भएकाे उपनगर क्यारेफोरका प्रहरी प्रमुख पियरे बेलामी सामेदीले सञ्चारमाध्यमलाई बताए । उनका अनुसार उडान भरेको केही समयमै विमान दुर्घटनाग्रस्त भएको हाे ।