काठमाडौँ । अरनिको राजमार्ग अन्तर्गत सिन्धुपाल्चोक भोटेकोशी गाउँपालिका-४ हिन्दीमा बोलेरो भोटेकोशीमा खसेको छ ।

तातोपानीबाट बाह्रबिसे तर्फ आउँदै गरेको बा २१ च ७५४४ को बोलेरो सडकबाट भोटेकोशी नदीमा खस्दा चालक र सहचालक बेपत्ता भएका छन् ।

प्रमुख जिल्ला अधिकारी वन्धुप्रसाद बास्तोलाका अनुसार बोलेरो भोटेकोशीमा खसेर सर्लाही बरथहवा नगरपालिका २ बस्ने २३ वर्षीय राजेश कुमार कुसवाह (चालक) र २५ वर्षीय राम प्रवेश महत्तो (सहचालक) बेपत्ता भएका छन् ।

दुर्घटनामा परेको बोलेरोलाई स्काभेटरको सहयोगमा डोरी लगाएर तान्ने बेलामा १ जना पुरुष व्यक्तिको शव भोटेकोशी नदीले बगाएको र अर्को शव पहिले नै बगाएको हुनसक्ने प्रजीअ बास्तोलाले बताए ।

भोटेकोशीले बगाएको व्यक्तिको शव प्रहरी चौकी हिन्दी र इलाका प्रहरी कार्यालय बाह्रबिसेले खोजी गरिरहेको प्रहरीले जनाएको छ ।