काठमाडौं । राज्यका महत्त्वपूर्ण अंगका प्रमुखहरूले अहिले सिर्जित विषम् परिस्थितिलाई राजनीतिक संवादका माध्यमबाट शान्तिपूर्ण समाधान निकाल्न अपिल गरेका छन् । साथै उनीहरूले प्रधानमन्त्रीबाट राजीनामा आइसकेकाले संयमित हुन पनि देशवासीलाई अपिल गरेका छन् ।

मुख्य सचिव एकनारायण अर्याल, प्रधानसेनापति अशोकराज सिग्देल, गृह सचिव गोकर्णमणि दवाडी, नेपाल प्रहरीका महानिरीक्षक चन्द्र कुवेर खापुङ, सशस्त्र प्रहरी बलका महानिरीक्षक राजु अर्याल र अनुसन्धान विभागका प्रमुख हुतराज थापाले एक अपिल सार्वजनिक गर्दै संवाद र छलफलमार्फत राजनीतिक निकास निकाल्न आग्रह गरेका हुन् ।

‘सम्माननीय प्रधानमन्त्रीज्यूको राजीनामा स्वीकृत समेत भएको हुँदा यस विषम् परिस्थितिमा थप जनधनको क्षति हुन नदिन आमनागरिक सबैलाई संयमित हुन हार्दिक अनुरोध गर्दछौं,’ अपिलमा भनिएको छ, ‘यस विषयमा राजनीतिक संवादको माध्यमबाट यथाशक्य छिटो शान्तिपूर्ण समाधान निकाल्न सम्बद्ध सबैमा हार्दिक अपिल गर्दछौं ।’