काठमाडौं । नेपाली कांग्रेसले क्रियाशील सदस्यता नवीकरण र अद्यावधिकको समयसीमा थप गरेको छ । कांग्रेसका महामन्त्री एवं सदस्यता व्यवस्थापन केन्द्रीय समितिका संयोजक प्रदीप पौडेलको अध्यक्षतामा बसेको बैठकले नवीकरण र अद्यावधिकको समयसीमा साउन ३ गतेसम्म थप गरेको हो ।

यसअघि यही असार २० गतेसम्म कायम गरिएको थियो । तर, वर्षायामका कारण वडा तहदेखि क्षेत्रीय तहसम्म सदस्यतासम्बन्धी आवश्यक प्रक्रिया सम्पन्न हुन बाँकी रहेको भन्दै कांग्रेसले समयसीमा थप गरेको हो ।

क्रियाशील सदस्यता अद्यावधिक र वितरण सम्बन्धमा कुनै समस्या वा गुनासो प्राप्त भएमा सो सम्बन्धमा सम्बन्धित जिल्लामा खटिएका केन्द्रीय प्रतिनिधिले सदस्यता व्यवस्थापन केन्द्रीय समितिसमक्ष सिफारिस गर्न सक्ने जनाइएको छ । उक्त सिफारिसका आधारमा सदस्यता व्यवस्थापन केन्द्रीय समितिले क्रियाशील सदस्यता अद्यावधिकको आवश्यक व्यवस्था मिलाउने कांग्रेसले जनाएको छ ।