प्रधानमन्त्री शाहले पौराणिक मान्यताअनुसार यमराज र उनकी बहिनी यमुनाबीचको प्रेम र सम्बन्धको प्रसङ्ग उल्लेख गरेका छन्। यमुनाको प्रेम, निष्ठा र आतिथ्यबाट प्रसन्न यमराजले यस दिन टीका र पूजा ग्रहण गर्ने दाजुभाइलाई दीर्घायु, सुस्वास्थ्य र सौभाग्य प्राप्त हुने वरदान दिएको विश्वास रहेको उनले बताएका छन्।

भाइटीकाका अवसरमा दिदीबहिनीले दाजुभाइको सुस्वास्थ्य, दीर्घायु र प्रगतिको कामना गर्दै पूजा गर्ने तथा दाजुभाइले पनि दिदीबहिनीलाई दक्षिणा दिएर आशीर्वाद ग्रहण गर्ने परम्परा रहेको उनले स्मरण गरेका छन्। भाइटीकाले दाजुभाइ तथा दिदीबहिनीबीचको प्रेम, विश्वास, आपसी सम्मान र आत्मीयतालाई अझ प्रगाढ बनाउन प्रेरणा प्रदान गरोस् भन्दै उनले शुभकामना दिएका छन्।