काठमाडौं । आइतबार पनि सार्वजनिक विदा दिने सरकारले गरेको निर्णय खारेजीको माग गर्दै सर्वोच्च अदालतमा रिट दायर भएको छ ।

सरकारले हचुवाका भरमा हप्तामा दुई विदा दिने निर्णय गरेको भन्दै अधिवक्ताहरू रामबहादुर शाही, तेजबहादुर लोहिया, सन्तोष भण्डारी र त्रिलोकबहादुर चन्दले आज सर्वोच्चमा रिट दायर गरेका हुन् ।

विज्ञ र सम्बन्धित निकायसँग आवश्यक छलफल नै नगरी मन्त्रिपरिषद्ले हठातमा हप्तामा दुई दिन सार्वजनिक विदा दिएको उनीहरूको भनाइ छ ।

उनीहरूले आइतबार पनि सार्वजनिक विदा दिने वैशाख २६ गतेको निर्णय बदर गर्न र परमादेश माग गरेका छन् ।

सरकारको निर्णयअनुसार जेठ १ देखि सरकारी कार्यालयमा शनिबार र आइतबार सार्वजनिक विदा कार्यान्वयन भइरहेको छ ।