काठमाडौं । किसानले समयमै रासायनीक मल नपाएको भन्दै संसदमा जरूरी सार्वजनिक महत्वको विषय दर्ता गराएको एमालेले सोमबारको संसदको कारवाही रोक्न सभामुखलाई दबाब दिएको छ ।

प्रतिनिधिसभा नियमावली २०७५ को नियम ७८ बमोजिम सार्वजनिक महत्वको विषयमा छलफल गर्न बैठकको कार्यक्रम स्थगित गर्नुपर्ने मागसहित संसद सचिवालयमा एमालेका १५ जना सांसदले स्थगन प्रस्तावको सूचना दर्ता गराएका छन् ।

प्रतिपक्षी सांसदले दर्ता गराएको प्रस्तावमाथि छलफल लागि सभामुख अग्निप्रसाद सापकोटाले संसदको कारवाही २ घण्टाको लागि स्थगित गरेका थिए ।

एमालेले दर्ता गराएको प्रस्तावमा सांसदहरूले तीन-तीन मिनेटको समय लिएर आफ्नो धारणा राखेका थिए । छलफल सकिएपछि सभामुखले आधा घण्टा बैठक स्थगित गरे ।

सोमबार नै मन्त्रीहरूले सांसदले उठाएका प्रश्नको जवाफ दिने र मंगलबार बजेट पारित गर्ने कार्यतालिका भएकाले सभामुखले पुनः बैठक सञ्चालन गरे ।

अहिले त्यही विषयमा छलफल गर्न कांग्रेस, एमाले माओवादी लगायत दलका प्रमुख सचेतकहरूको बैठक नयाँ बानेश्वरमा जारी रहेको छ ।