काठमाडौं । प्रतिनिधिसभाको बैठक बिहीबार पनि बस्दैछ । दिउँसो १ बजेका लागि तय बैठकमा प्रधानमन्त्री शेरबहादुर देउवा र अर्थमन्त्री जनार्दन शर्माले सांसदहरूको प्रश्नको सामना गर्दैछन् ।

सरकारद्वारा आगामी आर्थिक वर्षका लागि सार्वजनिक बजेटमाथि मन्त्रालय छलफल चलिरहेको छ । सांसदहरूले विनियोजित बजेटबारे केही दिनदेखि लगातार प्रश्न गरिरहेका छन् ।

मंगलबार पनि विनियोजन विधेयकमाथिको मन्त्रालयगत छलफलमा सांसदहरूले उठाएको प्रश्नको जवाफ दिने कार्यसूचीमा अर्थमन्त्रालय समावेश थियो । एमालेले विरोध गरेपछि अर्थमन्त्रीले संसद्मा जवाफ दिन पाएनन् । बुधबार भने अर्थ मन्त्रालयको जवाफ दिने विषय कार्यसूचीमा नै परेन ।

एमालेले संसदीय छानबिन समिति वा राजीनामा नदिँदासम्म अर्थमन्त्रीलाई जवाफ दिन नदिने जिकिर गरिरहेकाले आजको बैठकमा एमालेले अवरोध गर्नसक्ने सम्भावना छ ।

एमालेले अवरोध नगरेमा अर्थमन्त्री जनार्दन शर्माले विनियोजन विधेयक २०७९ पारित गरियोस् भन्ने प्रस्ताव आज नै पेस गर्नेछन् ।

सरकारले संसदमा पेस गरेको बजेट कार्यान्वयनका लागि संसदबाट बहुमतले पारित गर्नुपर्ने प्रावधान छ ।