काठमाडौं । न्यायाधीश र वकिलबीच घुस बार्गेनिङ प्रकरणबारे छलफल गर्न न्यायपरिषद् बैठक बोलाइएको छ ।

काठमाडौं जिल्ला अदालतका न्यायाधीश राजकुमार कोइराला र अधिवक्ता रुद्र पोखरेलबीच थुनामा रहेका व्यवसायी इच्छाराज तामाङलाई छुटाउन ०७८ पुसमा घुस बार्गेनिङ भएको अडियो मंगलबार साँझ सार्वजनिक भएको थियो ।

न्यायपरिषद् स्रोतका अनुसार, यसबारे छलफल गर्न कायममुकायम प्रधानन्यायाधीश दीपककुमार कार्कीले अहिले दिउँसो १ बजेका लागि बैठक डाकेका छन् ।

यो प्रकरणमा निलम्बित प्रधानन्यायाधीशसमेत मुछिएकाले यसबारे पनि छलफल हुने जनाइएको छ । अडियोमा न्यायाधीश कोइरालाले प्रधानन्यायाधीशको ग्रिन सिग्नल खोजेका छन् र वकिल पोखरेलले प्रधानन्यायाधीशसँग कुरा गर्ने बताएका छन् ।

अडियोमा वकिल पोखरेलले इच्छाराजलाई १० करोड रूपैयाँ धरौटीमा छुटाउन प्रस्ताव गर्ने र काम मिलाएबापत आफूले दुई करोड रूपैयाँ दाबी गर्ने बताएका छन् ।

सुरुमा यसबारे कुरा गर्न संकोच मानेका न्यायाधीश कोइराला माथिबाटै सेटिङ मिलाइने वकिलको आश्वासनपछि इच्छाराजको पक्षमा फैसला गर्न तयार भएका छन् ।

घुस बार्गेनिङका बेला जिल्ला अदालत, काठमाडौंमा  रहेका उनी अहिले पनि त्यही कार्यरत छन् ।

इच्छाराजलाई छुटाउन वकिलमार्फत न्यायाधीश राजकुमारलाई दुई करोड घुस !