काठमाडौं । प्रमुख प्रतिपक्षी एमालेको भ्रातृ संगठन युवा संघले अर्थमन्त्री जनार्दन शर्माविरुद्ध प्रदर्शन गरेका छन् ।

प्रदर्शनकारीहरूले ‘सिसिटिभी फुटेज खाने अर्थपूर्ण मुसा’ लेखेको व्यानरमा शर्माको अनुहार मुसाको शरीरमा जोडेर बनाइएको तस्बिरसहित आज काठमाडौंमा प्रदर्शन गरेका हुन् ।

अर्थमन्त्री शर्माले बिचौलियाको सहयोगमा बजेट निर्माण गरेको तथा सिसिटिभी फुटेज पनि गायब बनाएको भन्दै उनीहरूले प्रदर्शन गरेका छन् ।

युवा संघका कार्यकर्ताले ‘जनार्दन कि धनआर्जन’, ‘राजीनामा होइन, अब बर्खास्त गर’जस्ता नारासहितका प्लेकार्ड बोकेका छन् ।

गत जेठ १५ मा अर्थमन्त्री शर्माले व्यापारिक घरानाका व्यक्तिलाई बजेट निर्माण गर्ने जिम्मेवारी दिएको विषय बाहिरिएको थियो । ठूला व्यापारीका ती प्रतिनिधिहरूले बजेटमा आफूअनुकुल करको दर हेरफेर गर्न भूमिका खेलेको बताइएको छ ।

त्यसपछि उपभोक्ता हित संरक्षण मञ्चले सूचनाको हक प्रयोग गरी सिसिटिभी फुजेट माग गरेको थियो । तर, अर्थ मन्त्रालयले सिसिटिभी फुटेज मेटिसकेको जवाफ दिएको छ । यसबाट अर्थमन्त्री झनै आलोचित भइरहेका छन् ।

अर्थमन्त्री शर्मालाई बर्खास्त गर्न प्रचण्डको साथ खोज्दै प्रधानमन्त्री देउवा