काठमाडौं । नेपाली कांग्रेसको केन्द्रीय कार्यसमिति बैठक आज पनि बस्दैछ । बैठक पार्टी केन्द्रीय कार्यालय सानेपामा दिउँसो १ बजेदेखि सुरु हुने पार्टी सचिवालयले जनाएको छ ।

यसअघिका बैठकमा केन्द्रीय सदस्यहरूले आआफ्नो धारणा राखेका थिए । स्थानीय निर्वाचनको समीक्षा गर्न बोलाइएको बैठकमा नेतृत्वको चर्को आलोचना भएको थियो ।

शेखर कोइराला पक्षले सभापति शेरबहादुर देउवाको कार्यशैलीको आलोचना गरेका थिए । यस्तै, देउवा पक्षले महामन्त्रीद्वयको कायैशैलीको विरोध गरेका थिए ।

आजको बैठकमा पार्टीका शीर्ष नेता तथा पदाधिकारीहरूले धारणा राख्ने कार्यसूची रहेको कांग्रेसले जनाएको छ ।

केन्द्रीय सदस्य केशव बुढाथोकीले गुटको बैठकमा सहभागी भएको भन्दै महामन्त्रीद्वय गगन थापाको आलोचना गरेका थिए ।