काठमाडौं । विश्व स्वास्थ्य संगठन (डब्लुएचओ) ले मंकिपक्स फैलिएपछि विश्वभर स्वास्थ्य संकटकाल घोषणा गरेको छ ।

डब्लुएचओको आपतकालीन कमिटीको शनिबार बसेको बैठकले स्वास्थ्य आपत्काल घोषणा गर्ने निर्णय गरेको हो ।

डब्लुएचओका महानिर्देशक टेड्रोस एडहानोम गेहब्रेयससले पत्रकार सम्मेलनमा मंकिपक्स फैलिएपछि आपतकाल घोषणा गरिएको बताए ।

यसबाट मंकिपक्सको संक्रमण फैलनबाट रोकिने उनको भनाइ छ ।

डब्लुएचओले विश्वभर स्वास्थ्य आपतकाल घोषणा गरेको यो तेस्रो घटना हो । यसअघि कोरोना भाइरस र पोलिओको महामारी फैलिँदा डब्लुएचओले यसरी स्वास्थ्य संकटकाल घोषणा गरेको थियो ।

मंकिपक्स सबैभन्दा पहिले सन् १९५० मा मध्य अफ्रिकामा देखिएको थियो । हालसम्म विश्वका ७५ देशमा यो रोग फैलिसकेको छ । जसबाट पाँच जनाको मृत्यु भएको छ भने १६ हजार मानिस संक्रमित छन् ।