काठमाडौं । कांग्रेस नेता प्रदीप गिरिको अवस्था थप गम्भीर बनेको छ । यस अघि देखि नै घाँटीको क्यान्सरले समस्यामा रहेका गिरिलाई निमोनिया देखिएपछि ललितपुरकाे मेडिसिटी अस्पतालमा भर्ना गरिएको छ ।

भारतमा उपचार गराएर आएपछि साउनको पहिलो सातादेखि उनलाई मेडिसिटीमा भर्ना गरिएको थियो । निमोनिया फैलन नदिन भन्दै अस्पताल भर्ना गरिए पनि उनको स्वास्थ्यमा सुधार नआएको हो ।

‘उहाँको अवस्था क्रिटिकल नै छ । निमाेनियाकाे अवस्था उस्तै छ । केही समय अघि स्वस्थ्यमा अलिकति सुधार आएको थियो । तर अहिले स्टेबल नै छ ।’ शुक्रबार मात्रै अस्पताल पुगेर उनको स्वास्थ्य अवस्था बुझेका कांग्रेस नेता मीन विश्वकर्माले भने, ‘घाँटीको क्यान्सर पुरानै समस्या हो । यो फैलिएको छ । निमोनिया पनि बढ्यो । यसैले सुधार नै भन्न सकिन्नँ । त्यसैले चिकित्सकले अवस्था स्टेबल नै भन्नुभएको छ ।’

गिरिको भारतको दिल्ली र बम्बइ शहरमा क्यान्सरको उपचार भएको थियो । उनलाई निमोनियासँगको संक्रमण पनि देखिएको थियो । रोगसंग प्रतिरोधगर्ने शक्ति घट्न नदिन उनलाई फर्किएलगत्तै मेडिसिटी अस्पतालमा भर्ना गरिएको थियो । तर एक महिना उपचार गर्दा पनि उनकाे स्वास्थ्यमा अपेक्षित सुधार नअाएकाे हाे ।

शुक्रबार उनको स्वास्थ्यलाई लिएर धेरै कांग्रेस नेता र शुभेच्छुकले स्वास्थ्यलाभको कामना गरिरहेका छन् ।

कांग्रेस नेता प्रदीप गिरि अस्पताल भर्ना, कस्तो छ स्वास्थ्य अवस्था ?