काठमाडौं । गतवर्ष सर्वोच्च अदालतको उत्प्रेषण आदेशमार्फत एमाले र माओवादी मिलेर बनेको नेकपालाई बदर गर्ने नेता हुन् ऋषि कट्टेल । उनले नेकपा नामको पार्टी पहिले आफ्नो भएको भन्दै एमाले–माओवादी मिलेर बनेको नेकपा खारेज गर्ने मागसहित मुद्दा हालेका थिए ।

सर्वोच्चमा लडेर पार्टी फिर्ता ल्याएका कट्टेललाई उनकै पार्टीले साधारण सदस्यसमेत नरहनेगरी निष्काशन गरेको छ । माघ १३ गते नेकपाले एक विज्ञप्ति जारी गर्दै कट्टेलाई साधारण सदस्यसमेत नहरनेगरी निष्काशन गरेको जनाएको छ ।

पार्टीको विधानविपरीत दलको अहित हुनेगरी काम गरेको भन्दै माघ ५ गते छानबिन समिति बनाइएको थियो । तर, छानबिन समितिले माघ ७ गते मागेको स्पष्टीकरणको जवाफ नदिएपछि निष्काशन गरिएको विज्ञप्तिमा उल्लेख छ ।

पार्टीले लोकनारायण सुवेदीलाई कार्यबाहक अध्यक्षको जिम्मेवारी दिएको छ । सुवेदी एकताको राष्ट्रिय सम्मेलन तयारी समितिका संयोजकसमेत हुन् ।