काठमाडौं । रुसी राष्ट्रपति भ्लादिमिर पुटिनले आफ्नो देशलाई युक्रेनसँगको युद्धमा तान्न अमेरिकाले भूमिका खेलेको आरोप लगाइरहेका छन् ।

पछिल्लो समय रुसले युक्रेनको सिमाना नजिकै ठूलो संख्या सेना तैनाथ गरेको छ । यसले यी देशबीच तिक्तता चुलिएको छ । यहीबीच उनले अमेरिकामाथि युद्धमा तान्न खोजेको आरोप लगाएका हुन् ।

रुसमाथि प्रतिबन्ध लगाउने बहानाका रूपमा उक्त टकराबलाई प्रयोग गरिएको पुटिनको दाबी छ । उनले युरोपमा नेटो गठबन्धन सेनाबारेको रुसी चिन्तालाई अमेरिकाले बेवास्ता गरेको बताए ।

‘मेरो विचारमा संयुक्त राज्य अमेरिका युक्रेनको सुरक्षाबारे धेरै चिन्तित छैन । तर यसको मुख्य काम रुसको विकासलाई रोक्नु हो। युक्रेन त्यो अमेरिकी लक्ष्यमा पुग्नको लागि एउटा मोहोरा मात्र हो भन्ने देखिन्छ,’ हंगेरीका प्रधानमन्त्री भिक्टर ओर्बानसँगको वार्तापछि पुटिनले भनेका छन् ।